Profilo di KenixHappy DayFotoBlogElenchiAltro  |  Strumenti Guida |
|
28 aprile >_<因為老公工傷既關係, 所以佢細妹 即係軒軒既姑姐上黎我地度訓幫手湊軒軒, 我就要照顧老公, 因為佢2個膊頭用唔到力, 個頭又穿左, 左邊鎖骨位又有骨折, 都幾嚴重, 但佢因為太太太悶所以住左2晚醫生又俾佢出院, 咁就包住晒野返黎屋企休養了.
初初我真係攰到死, 因為有時姑姐又搞唔掂軒軒 咁我就要出手, 跟住又要照顧個大既, 個2個星期真係飛人生活, 簡直痴左線. 好彩老公都好得好快, 呢個星期都叫做輕鬆d了, 佢可以自己用到力拎野等等, 個頭同埋其他聯左針既地方都拆晒線了, 係個膊頭仲會好痛囉, 不過我知慢慢就會好的.
因為佢係九龍個邊出事, 所以當時送左佢去廣華醫院. 嘩 ! 第一次入個間醫院真係嚇我一跳, 一入去周圍都係黑白相, 同埋d 醫生 好似留留地, 完全唔專業同埋問佢咩都唔識答囉
 因為姑姐係度訓既關係, 佢既返工時間遲我成個鍾的, 咁我工人見既然有人係度佢又自己遲埋一份, 真係火都黎, 佢平時都已經例遲2-3個字我都算了, 只要係我出門前到就算, 不過我知佢實會因為姑姐係度唔會再趕黎, 佢今朝就係咁樣同我講囉, 所以佢係我要出門口既時間遲左2個幾字, 我即打俾佢啦梗係, 話係樓下囉, 上到黎話以為我走左, 諗住姑姐係度咪等平巴士囉, 跟住我話佢係度都要趕返工, 佢都有自己野做架嘛, 唔會湊到軒軒架, 我話我點都要等佢黎我先行囉, 跟住拿拿聲講低d 野俾佢我就飛的了, 真係離譜囉, 我心諗如果姑姐咁岩尋晚唔係度訓咁點呢. 唉~~~  25 marzo 欠缺安全感......上星期層樓賣了, 實在估唔到咁快就賣得出, 放盤睇樓都係2日時間, 第3日就有人要呢, 個刻都有開心既, 因為離我既目標又近了, 向大屋出發, 但只係開心左一陣, 跟住就諗要執野啦, 唔知搬去邊呢, 老公又話呢幾個月租住樓先, 要等個樓價再跌多d 先買啦, 咁 即係要搬2次啦, 諗到呢度已經覺得煩, 算了, 最令我無安全感既係完全唔知黎緊會住邊, 感覺好似好迷惘, 見唔到前面既路係點樣, 個種感覺都唔識講了.........
不過點都好啦, 起碼終於都有機會搬間大d 既屋俾軒軒有多d 空間就已經好好了.
另外, 上個sat 軒軒終於識反晒成個身扒係度了, 個刻我眼濕濕, 跟住即刻打俾老公, 真係好開心呀, 佢扒係度個時就會好似一隻蝦咁彈下彈下笑死人, 佢自己都好開心呀, 不過我地就絕對唔可以再放佢自己係大床度了, 太危險啦 !! 09 marzo 6個月的軒軒唔覺唔覺軒軒半歲了, 每日忙著返工湊仔, 都已經習慣了, 不過真係勁攰囉, 但係好充實, 同埋成日唔記得自己想做咩.............
衰仔咁細個就睇過2次醫生, 餵佢食藥係一件苦差, 於是我周圍問人有咩方法啦, 原來可以溝埋d奶一齊食既, 雖然無咁直接但都好過一餵佢就bid 番晒出黎=無食過吖嘛, 同埋猴棗散真係work, 軒軒少左好多痰同埋咳, 真係唔該晒各位朋友既意見呀! 咁後日就可以帶佢去打埋半歲支針了.
不過最幣係軒軒仲未識轉身, 應該話未識轉晒成個身扒係度, 佢轉到一大半, 但隻手仔頂住左轉唔到過去, 個pat 就好成功咁轉到了, 實在太慢了, 好擔心佢學咩都慢呢 !!
食野方面, 佢已經肯食糊仔了, 不過就未識食粥仔, 所以我都要叫工人慢慢再俾佢試粥仔了, 但仲未出牙仔囉, 佢好似咩都慢過人咁既...  03 marzo 陰沉的心情上星期六開始唔知點解個心情一直都係陰天, 成日都好似有野放唔底咁, 可能自己又病了, 仲未好番, 加上夜晚我開始俾軒軒訓番係佢自己張床仔度, 我又成日擔心自己唔夠訓喎. 因為之前佢係同我一齊訓的, 咁發覺到佢都慢慢可以一覺訓天光了, 咁我就唔使半夜起身所以就俾佢習慣訓番自己床仔啦, 最衰張床仔係廳, 如果我半夜起身走出去我自己就會醒晒了, 所以我之前先將佢同我一齊訓囉, 咁最初兩晚佢係床仔都可以一覺訓天光, 好好的. 但到呢兩晚佢開始傻左咁, 半夜係咁醒, 咁又唔係咁又唔係, 搞到我同老公差d想打死佢呢, 我老公都話可以訓番唔理, 但我就要不停咁起身出廳咁來回唔知幾多次了, 我完全係失眠狀態囉, 但呢兩日又唔係太眼訓喎, 不過感覺個人好似唔係自己咁囉, 每日都係得個軀殼完全無靈魂的, 尋日軒軒開始流鼻涕又有幾聲咳, 咁我都有俾保嬰單佢食的, 不過都無用, 尋晚又聽到佢鼻塞塞地訓唔好呢, 所以今日我放左工都要帶佢去睇醫生了.  10 febbraio 軒軒陪我過生日今年既生日屋企多左個新成員, 佢就係軒軒, 不過就俾佢玩死我了, 所以今日係超級眼訓呢 !
尋晚最後餐奶我提早左半個鍾俾佢食, 因為我好眼訓諗住佢早d食完我可以早d訓啦, 點知條友死都唔肯食, 可能係之前個餐成8點幾先食, 因為要等我放工返去先餵到, 個daddy 唔會話幫手餵住先, 所以臨訓前個餐我試下10:45餵啦, 加上佢之前食飽無訓過, 扭到我差d 想掟佢落街, 終於daddy 出馬, 又打又哄先食左2安, 不過佢打佢手仔個時我個心係痛一痛的, 睇黎我都係寵個個黎架啦, 唉~~
之後見佢死都唔肯食就俾佢訓啦, 好快訓著了, 訓訓訓到5點 醒左, 以為要換片啦又唔係, 好彩佢醒一醒又訓番, 不過我都醒埋, 終於搞到今朝唔知醒囉.
唉! 個衰豬性格似足daddy, 真係幣家火
 不過呢個生日有軒軒同daddy仲有bb哥哥(my dog)一齊過真係好開心呢 !!  02 febbraio 自私的爹D自從軒軒出左世後, 我係屋企既娛樂就係湊仔, 所以我係完全無時間上網, 屋企部電腦就只有老公用, 要check email 唯有返公司先check到, 仲要公司blocked 埋個facebook, 搞到我咩都玩唔到了.
於是我就同老公講為左方便湊仔不如買部notebook 等我可以係房邊睇住軒軒邊上網啦咁, 都講左好幾個月了, 到左前幾日佢話想買PS3玩, 佢話阿邊個邊個係咁叫佢買, 我個刻真係有D嬲, 不過我好心平氣和咁同佢講"好呀買啦, 我唔買notebook啦, 我想換樓先, 如果你想玩既咪買囉", 佢當然聽得出我既不滿啦, 咁岩上網有個plan 係買notebook 平既, 不過當然要用佢個網啦, 於是老公話會用呢個plan 黎買部notebook 俾我, 我個刻居然無開心既感覺, 只係覺得無奈........我唔識講, 但係會諗我用notebook 唔係完全為左玩, 係真係有用先買, 唔通我要成日抱住個仔係電腦房上網咩, 但係佢買PS3 真係完全係玩囉, 平時我都唔使佢點湊仔了, 佢咪又係每日上網跟住就出廳打機, 我依家有少少要求啫, 仲要俾人串囉, 真係火都黎呀!!
 仲有, 我3月10號公司annual dinner, 所以個日一定夜返的, 我同佢講要開始同軒軒換下片啦, 佢即刻話會帶軒軒上契媽度俾佢湊喎, 我又火都黎, 依家個仔係我地架, 唔通我要等個仔大個我先可以同d 朋友出下街食下飯咩? 咁唔通我夜晚真係要出街時你就帶個仔邊人湊? 雖然契媽係唔會介意, 但唔可以每次都係咁囉, 所以最後佢都會自己湊番. 激死人 ~~
好多朋友都以為佢真係變左一個好爸爸, 錯了 ! 我都俾佢呃左. 因為係我坐月期間佢就真係負責餵奶同埋湊佢既, 不過當我坐完月之後佢就唔理了, 我仲要係開刀生個傷口成日都陰陰痛, 有時想佢夜晚餵下奶等我唔使咁夜訓啦, 佢唔會囉 !! 19 gennaio 軒軒病了軒軒咁多個月以黎除了打針後發燒外前兩日病了, 傷風流鼻水又咳咳呢, 所以尋日大契爺車我地去睇醫生, 好彩都只係普通傷風咳, 不過最頭痛就係餵佢食藥了, 我地用針筒餵啦, 第一次餵到我火都黎, 我必幾多入佢個口度佢就必番晒出黎, 激死我, 餵佢食藥簡直係要同佢角力呀, 終於食左半個鍾就食晒, 不過應該食一格既佢就會必番細半格既份量出黎囉, 咁樣點會好架. 我又唔知可唔可以mix 落支奶度俾佢一齊食喎, 因為我地試過mix 落支水度佢唔肯飲, 咁但係又要飽肚食, 有d人又話可以溝埋支奶一齊餵, 咁咪唔係飽肚囉 ?! 所以我就趁佢喊個時必入佢個口跟住要快過佢俾水水佢飲, 如果唔係佢就必晒出黎了.  12 gennaio 厭奶期軒軒已經4個幾月了, 開始好多bb都有既厭奶期, 開始食剩好多甚至乎唔食呢, 不過我都唔勉強佢食, 上網睇過話bb 厭奶有好多種原因, 排除左佢唔舒服呢個因素, 係可能唔鍾意奶既味道, 因為佢食左幾個月了, 開始覺得厭, 又可能係太多其他引誘, eg. 有人同佢講野or 電視, 不過呢樣唔會影響到軒軒, 佢會望一望就繼續食番的.
上星期四帶佢去打針, 磅左成17磅了, 佢今次都一樣喊兩聲就唔喊了, 仲要今次無發燒呢, 好叻仔呀!!  姑娘話5個半月度先俾佢食糊仔喎, 不過我係度諗佢依家唔肯食奶, 但佢個款又唔係好肚餓既, 咁我要唔要提早d俾糊仔佢試呢 ? 不過都係睇多幾日先算了. 15 dicembre 好驚呀!!!!!!!!!!!!!剛剛個星期六我長週要返工, 我坐係度做野啦, 咁我個位係對住個樓梯上上落落既, 咁個日有個女人企係樓梯口講左好耐電話, 因為佢好大聲所以我就望下佢, 同埋佢係我地門口行左幾次, 咁我以為佢會入黎揾人or 點啦, 所以我望左佢好耐, 之後我見佢擒左上個窗台度, 但我就係度諗以隻窗應該開唔到架, 無事既, 咁同埋我以為佢擒上去有人接住佢啦, 因為無見佢落番黎, 咁我一直都唔在意, 之後無幾耐就有好多police & 太古地產(呢度係屬於太古架嘛) 既人係我地樓上同呢層行黎行去又影相呀咁, 我就開始驚咪揾左個同事出黎叫佢出去睇下咩事, 咁剛好有個courier 送野黎, 佢話有個人係度抺抺下窗 跌左落去救唔番啦, 因為我地係用吊船係大廈外面抺的, 咁我更加不為意啦, 不過都有d驚, 因為係正正我呢座樓, 咁尋日傾開野老公就話睇報紙話唔係抺窗係個女人自殺喎, 仲有遺書留低, 我個刻即刻好好好驚, 咁因為我以為係工業意外就無同任何人講話見到呢個女人, 咁我同老公講話我見過佢咁樣呀, 佢唔理我囉因為佢成日都覺得我大驚小怪, 下 ! 我即刻成個人震晒
, 好彩我真係睇唔到佢做咩同埋我唔8掛走出去睇佢啫, 咪我依家睇緊心理醫生啦, 同埋我係度諗如果我真係8掛既走出去睇下就會見到晒, 同埋如果我去勸佢既可能連我都有事呢.今日同事研究過原來隻窗係開到架 !! 我今日唔敢望出去, 一望就會諗番起了.  20 novembre 戒夜奶唔知軒軒係咪已經叫做戒左夜奶呢! 因為呢兩個星期我地定時俾佢食奶, 就算訓左都照俾佢食, 當然佢都食啦呢個大食仔, 不過佢好似鬧鍾咁準時醒, 所以都唔使點整醒佢, 係夜晚個餐就要佢醒囉, 12點半前一定俾佢食, 於是佢都可以訓到4-5個鍾醒一醒, 換左片又自己訓番, 都無好扭計要食奶呢, 不過前晚好好笑, 4點幾換片諗住佢訓番啦, 點知佢自己係度"阿估" "阿估" 囉, 我咪又要同佢阿估左一陣囉, 俾佢激死, 好彩後來都訓得番.
咩叫"阿估"呢? 其實就係前排留意到軒軒自己係度發音, 又要聊人講野啦, 咁聽到佢好鍾意"阿估", 於是我一句佢一句, 佢就笑晒咁囉, 所以我地依家都會成日同佢阿估, 傾少陣都唔得架, 3個月都未夠就開始想講野了, 阿仔你大個會唔會係個d吱吱喳喳既小朋友黎呢 ?  咁咪吵死人 ? 不過都好過唔講野既 ~ 04 novembre 軒軒兩個月了唔經唔覺軒軒已經兩個月了, 而我都返左工一個星期, 真係好唔慣呀, 成日都好掛住軒軒, 一放工係飛奔返屋企, 佢食飽奶就會要人同佢傾計, 一傾就成個鍾, 我口都乾埋, 但見到佢成日笑就好開心了.
尋日帶佢去健康院打四合一既針, 佢出世到依家帶過佢去打兩次, 都係喊幾聲就無事, 尋日仲勁, 喊左兩聲就無事了, 軒軒好叻仔呀!!! 不過今次呢支唔知係咪勁d, 佢尋日成日都好眼訓, 今日仲發燒添, 好彩有藥食, 但我都好擔心佢呢! 20 ottobre 我的軒軒出世了 2008年8月31日早上6點01分軒軒終於出世了, 有7磅8咁重呀, 諗番起就真係痛死左, 我仲要入左院兩日佢先肯出黎, 鬼咩, 佢唔知係咪聽到佢daddy叫佢過左農曆7月仲要俾佢睇埋場波先好出花世咁囉, 所以佢出世個時間真係好準時呀完全聽晒daddy話囉, 但辛苦死我囉....  跟住半夜推入產房痛左幾個鍾先話開刀, 因為我都係生唔到, 好彩老公一直都陪住我所以我無喊呀,. 嘩 ! 姑娘話call得醫生開刀個刻我真係開心晒, 因為都幾驚險呀, 聽老公講番話bb係我個肚度有段時間個心跳趺得好低, 姑娘話唔可以再等所以開刀囉, 老公話佢都好驚, 當佢聽到有bb喊佢先識笑番咋, 個刻其實我好感動架, 因為佢之前話死都唔肯入產房架, 所以我好開心.我住左成個星期醫院先返家, 返到去有d唔慣, 因為sofa無左, 變左張bb床, 好彩我隻狗仲認得我咋, 個日我勁訓呀, 因為係醫院完全無覺好訓, 一黎唔慣啦, 二黎仔仔每3個鍾食一次奶, 半夜起身餵奶係最辛苦的, 所以頭一個月真係有抑鬱, 唔想見人唔想講野唔想出街, 坐坐下喊, 餵餵下奶又喊, 簡直痴左線, 後來朋友成日都陪我老公同奶奶又幫手湊, 開始好好多了, 加上坐完月我有得出下街個人就好好多了. 軒軒依家就黎兩個月啦, 希望佢快d戒到夜奶啦, 因為我要返工架嘛, 不過佢成11磅bb應該無咁易戒到呢, 大食到呀 !!! 不過有時真係好忟架, 佢成日扭計, 但係依家同佢玩傾計佢開始識俾反應了, 成日笑又開始咿咿呀呀真係俾佢激死架 !! 呢個幾月真係要多謝軒軒既幾個契媽同埋d姨姨們成日上黎陪我地呢, 又幫手添呀, 真係唔該晒呀 !!  28 luglio 好重呀~~~上星期去左醫院照多次超聲波, 醫生話不不依家成2.5kg, 即係有5磅半啦, 怪之得我陀得咁辛苦啦, 真係好重呀, 好驚我要生個7磅b出黎呀, 點生呀 !!!
 不過知道佢已經有咁重都開心既, 起碼知道佢好吸收嘛. 但另一方面我就好驚生得好辛苦, 始終不不應該唔係mini size既bb, 而醫院亦唔會即刻決定到可以開刀, 好驚會焗親不不呀!! 不過生都係一個過程亦唔到我地擔心咁多了, 所以我都係咁同自己講放鬆d, 同埋呢排成日都幻想生個時既情況, 又周圍問定人了, 所以都有晒心理準備架!
仲有一個月就出世啦, 快d快d快d.................................  07 luglio 32週不知不覺陀住不不已經到左第32週了, 仲有兩個月就生啦! 好多人都問我緊唔緊張, 其實呢一刻真係未識緊張, 同埋我要保持心情開郎同輕鬆嘛. heehee~~~
不過依家我同老公開始執屋了, 因為黎緊會有張bb床仔同埋好多袋衫仔到, 我隻狗就慘了, 平時有4個位俾佢訓, 依家得番2個, 因為無位放佢個張狗狗床了, 依家只有我地張sofa同個狗籠係佢個位, 好可憐呀!! 不過我地一定會訓練到bb哥哥同不不做好朋友的, 因為兩個都係我個仔. hahaha
另外係度要祝個朋友上星期六生個左肥bb女, 成7磅8安士呀! 佢臨生前一星期度我見過佢個肚同我依家差不多, 唔知我不不有無咁重呢 ? 係就幣了, 我依家已經feel到條腰同對腳開始橕唔到, 又食唔到又訓唔到, 就黎痴線呢 !!
 點都好啦, 我捱多一陣就舒服了, 同埋真係好想快d見到不不個樣, 希望佢d性格唔好似佢火爆daddy啦, 咪我就一定激死囉.
hahahahaha................................... 03 maggio 奇妙的感覺我終於都感受到阿仔係肚裡面郁黎郁去既感覺了, 個種感覺真係難以形容, 只有十月懷胎既媽咪先感受到, 不過阿仔通常早上同夜晚會郁得多d, 可能佢晏晝要訓覺豬啦!
依家慢慢習慣左, 我成日係度諗生出黎就無左呢種感覺了, 真係有d唔捨得呢! 哈~ 不過當然我係好想快d生佢出黎, 因為我越黎越論盡了, 好多動作都做唔到, 真係唔敢想像過多兩個月再大d會點喇.
同埋我開始覺得自己個樣都變男人了, 可能真係陀住仔既關係, 男性荷爾蒙開始出黎了, 好好笑呀!!  22 aprile 痛2008年4月20日晚上, 當我洗完碗睇緊電視既時候, 收到媽咪既電話, 佢忍痛的話我聽女麻女麻剛走了, 個刻既感覺完全唔識形容, 只係識不停咁喊, 個腦一片空白. 實在太突然了, 不過佢無病痛的只係已經九十幾歲了, 所以媽咪話好安詳, 但最可惜係我去唔到見佢, 因為媽咪話大肚婆唔好去太多個d地方, 所以個刻只有爸爸,媽咪同細妹陪住女麻女麻, 我亦覺得好遺憾係佢之前都出席唔到我既婚禮, 依家更加睇唔到我個bb出世, 因為佢幾年前開始有老人痴呆, 所以去到老人院睇佢都唔認得我地了.
女麻女麻都算係由細湊到我大的人, 佢同婆婆兩個一齊湊我的, 佢地一直都係一齊住的, 相處融合, 就算到後來入老人院都係住同一間. 但我記得細個時成日蝦佢的, 因為我痴婆婆多d, 而女麻女麻就負責煮飯, 個時佢地都寵到我不得了, 屋企裡面可以話我最大, 但後來到我出黎做野時女麻女麻既記性越黎越差了, 而婆婆又開始有帕金遜病, 兩個開始成日吵架, 而屋企又無人睇住佢兩個大細路, 於是迫於無奈要送佢地入老人院, 跟住就逄週日飲完茶會去探佢地, 拎點心俾佢地食, 其實佢地都好鍾意食野的, 所以佢地煮既送都係我最鍾意食的, 不過好耐無食過了.
 而女麻女麻係老人院都係食得訓得既, 無咩病痛, 只係唔認得人啫, 爸爸都成日同佢講d後生時既野, 佢反而記得, 佢最鍾意打牌, 每次我地都會同佢講"去打牌lu", 佢就會咪住眼話"好好", 見到佢個樣都好好笑, 但唔知點解佢要咪眼既呢.
今次係我咁大個女第一次有親人離開自己, 所以個情緒好唔穩定, 不過今日好好多, 都打過俾爸爸聽佢把聲都好好, 相信大家都已經接受了, 所以我同細妹都要加油了.
11 aprile 我要做個靚媽咪今年9月將做媽咪既我唔經唔覺已經大肚4個月了, 其間真係幾辛苦, 戒口之餘又病多左, 醫生又唔開得重藥俾我, 搞到病左好耐都唔好, 唯有自己戒口啦, 阿仔, 阿媽陀住你幾咁辛苦你知嗎? 我終於都明白媽咪既偉大了.
尋日去左醫院做檢查, 我問醫生睇到男定女未呀? 醫生話"似乎係仔", 呢個答案真好, 因為可能連佢都唔肯定, 我見bb係度係咁郁黎郁去唔定的, 好似唔多想俾我地知道佢既性別, 不過都預左佢係個八厭仔, 老公知道後有少少失望, 因為我地兩個都鍾意女的, 不過我做足心理準備, 所以無失望, 反而係度諗仔都好呀, 煩少好多野, 係驚佢第時大個學壞同埋俾女仔呃啫(又或者佢搞大人個肚咁囉)
 . 不過我估佢個性格應該同個爸爸好似, 如果係就死啦, 兩個相同性格既人係屋企實激死我囉. 不過點都好, 最緊要係佢健康同開心咁成長咁我就安樂晒. 不過性別既野好難講, 點都要生出世先準確既.阿仔呀, 你乖d啦, 俾媽咪快d好番晒唔好病啦, 媽咪唔想你食咁多藥呀! 乖仔 !!
|
|
|
